Փաշինյանը Լոս Անջելես-Հայաստան համաժողովում ներկայացրեց Հայաստանի տնտեսության գերակա ուղղությունները

Վարչապետ Նիկոլ Փաշինյանը ելույթ է ունենում Լոս Անջելես-Հայաստան գործարար համաժողովում, Լոս Անջելես, 23-ը սեպտեմբերի, 2019թ

Միացյալ Նահանգներ այցի երկրորդ օրը վարչապետ Նիկոլ Փաշինյանը սկսեց Լոս Անջելեսում անցկացվող տնտեսական համաժողովից:

Լոս Անջելես-Հայաստան համաժողովին մասնակցում էին մոտ 300 տեղացի գործարարներ, Կալիֆոռնիա նահանգը ներկայացնող բիզնեսմեններ, որոնց Հայաստանի ղեկավարը պատմեց երկրի ներդրումային միջավայրի մասին, ասաց, որ իշխանափոխությունից հետո հիմա էլ տնտեսական հեղափոխություն է ծրագրել: Փաշինյանը ներկայացնում էր Հայաստանի տնտեսության գերակա ուղղությունները՝ տեղեկատվական տեխնոլոգիաներ, գյուղատնտեսություն, զբոսաշրջություն: Վարչապետն ասաց, որ իր քաղաքականության առանցքում կոռուպցիայի և մենաշնորհների բացառումն է:

Արդեն օրվա երկրորդ կեսին Հայաստանի վարչապետը Լոս Անջելեսից ժամանեց Սան Խոսե՝ աշխարհահռչակ Սիլիկոնային հովիտ, որտեղ տեղակայված են տեղեկատվական տեխնոլոգիաները ներկայացնող մի շարք հանրահայտ ընկերություններ, կորպորացիաներ: Ինչպես հայտնի է, այստեղ նաև բազմաթիվ հայեր են աշխատում՝ հիմնականում վերջին տարիներին Հայաստանից այստեղ եկած տեղեկատվական տեխնոլոգիաների մասնագետներ, որոնց հետ վարչապետը մոտ մեկ ժամանոց հանդիպում անցկացրեց, պատասխանեց նրանց հարցերին, և, իհարկե, այս հանդիպմանը նույնպես չշրջանցվեց Ամուլսարի հարցը:

«Ես միշտ զարմանում եմ մեր ժողովրդի էդ հատկության վրա, որ կարելի ա գալ Սիլիկոնային հովտում եզրակացնել, որ մեզ հանք պետք չի՝ մի երկրում, որը ամբողջ քաղաքակրթությունը կառուցել ա առաջին հերթին հանքի վրա, հասկանում ե՞ք: Ամերիկայի Միացյալ Նահանգների պատմությունը հանքերի պատմություն ա, որովհետև մարդիկ էստեղ էկել են «ոսկու տենդի» հետևից, հետո էկել են պղնձի հետևից, հետո էկել են ածուխի հետևից, հետո էկել են նավթի հետևից, հետո էկել են գազի հետևից, և ձեր եզրակացությունը Միացյալ Նահանգներում էն ա, պնդումը, որ հանք պետք չի: Դուք ասում եք, որ Հայաստանը պետք ա լինի ագրարային երկիր, որտեղ միշտ պետք ա դաշտերում մայեն ոչխարները, մենք էլ փափախով ծառի տակ պետք ա նստած լինենք: Էս՝ ընդհանուր գաղափարի մասին», – հայտարարեց Փաշինյանը:

«Իսկ ինչ վերաբերում է Ամուլսարի հանքին, գիտե՞ք, ժողովուրդ ջան, նույն հարցը ունի նույն պատասխանը. մենք մինչև վերջ պետք ա ազնիվ լինենք էդ հանքի հետ կապված՝ և՛ հայ հանրության հետ, և՛ միջազգային հանրության հետ: Սա շատ կարևոր արձանագրում է, և իմ արձանագրումը հետևյալն է՝ եթե էդ հանքը հնարավոր է շահագործել շահագործող ընկերության հռչակած պարտավորությունների շրջանակում, այսինքն՝ 100-տոկոսանոց էկոլոգիապես անվտանգ, դա կշահագործվի, եթե հնարավոր չի, չի շահագործվի: Ես ասում եմ՝ մինչև վերջ պետք ա գնալ ճշմարտության հետևից», – շեշտեց Հայաստանի կառավարության ղեկավարը:

Սիլիկոնային հովտում վարչապետը եղավ «Nvidia» խոշոր ընկերությունում, նաև այցելեց «Synopsys»: Նա հետաքրքրված էր՝ ինչպես է զարգացել այս ոլորտը, ինչ ճանապարհ է անցել, և նաև փորձում էր ըմբռնել, թե Հայաստանում ինչպես կարելի է կիրառել այս փորձը:

Վարչապետի խոսնակ Վլադիմիր Կարապետյանը լրագրողների հետ զրույցում ասաց. – «Երևի գիտեք, որ նախկինում էլ էին իշխանությունները խոսում IT ոլորտի առաջնայնության մասին, դա կարծես մոդայիկ ինչ-որ մի հայտարարություն էր դարձել, որը չէր ամրապնդվում կոնկրետ գործողություններով: Այս պարագայում տենց չի, այն, որ իշխանությունները հիմնեցին կառավարության կազմում Բարձր տեխնոլոգիաների նախարարությունը, այն, որ առաջնայնություն համարվեց այս կարճատև այցի ընթացքում մեկ օր նվիրել Սիլիկոնային հովտին և այս այցելությանը, այն, որ վարչապետը համաձայնել է և սիրով պետք է հանդիպի այստեղ աշխատող հայերի հետ, և նաև այն, որ ստորագրվում են մի քանի համաձայնագրեր այս այցելության ընթացքում, ցույց է տալիս, որ սա ոչ թե խոսքեր են, այլ իսկականից վճռականություն է՝ հնարավորիս մեծ շեշտադրում անել այս ոլորտում կառավարության գործունեությանը»:

«Ամեն ինչ, ինչ վերաբերվում էր այդ թնջուկին, ասվել է»


Ի դեպ, Կարապետյանն այսօր նաև արձագանքեց Ազգային անվտանգության ծառայության նախկին տնօրեն հերթական աղմկահարույց հայտարարությանը՝ ասելով. – «Ես կասկածում եմ, որ նա խոսի, մենք ասել ենք մեր մոտեցումները, կարծում եմ՝ դրանից ավել այս պահին խոսելը անիմաստ է: Ամեն ինչ, ինչ վերաբերվում էր այդ թնջուկին, այդ խնդրին, ասվել է»:

Լրագրողներից մեկի դիտարկմանը՝ իր երեկվա խոսքն էլ Արթուր Վանեցյանը սկսել է նրանից, թե Նիկոլ Փաշինյանը խախտում է լռելու մասին ձեռք բերված պայմանավորվածությունը, մարդիկ է ուղարկում, որ ինքը դադարի խոսել, վարչապետի խոսնակն արձագանքեց. – «Ինձ նման բան հայտնի չէ, և ես կասկածում եմ, որ ճիշտ է ասում»:

«Որևէ նախապատրաստական աշխատանք չի տարվել բարձր մակարդակի հանդիպման»

Վլադիմիր Կարապետյանին հարց ուղղեցինք նաև՝ արդյո՞ք հնարավոր է, որ վաղը Նյու Յորքում հանդիպում տեղի ունենա Նիկոլ Փաշինյանի և Ադրբեջանի նախագահ Իլհամ Ալիևի հետ: Վարչապետի խոսնակն ասաց. – «Գիտե՞ք, սովորաբար նման հանդիպումները պատրաստվում են: Ոտքի վրա հանդիպման արդյունավետությունը ինձ համար այդքան էլ հասկանալի չէ: Ես չեմ ուզում բացառեմ, բայց քանի որ որևէ նախապատրաստական աշխատանք չի տարվել բարձր մակարդակի հանդիպման, կարծում եմ, թերևս, վաղաժամ է»:

Միևնույն ժամանակ, Կարապետյանը շատ կարևորում է արտգործնախարարների հանդիպումը, «որը որոշակի դադարից հետո հնարավորություն կտա ճշգրտելու մեր մոտեցումները, մեր սպասելիքները, Ադրբեջանի մոտեցումների թարմացում մենք կփորձենք լսել՝ արդյոք կա՞ որոշակի փոփոխություն պաշտոնական Բաքվի դիրքորոշումներում, և հույս ունեմ, որ այն կարող է նպաստել առաջնորդների հանդիպմանը, բայց այս պահին դրա մասին խոսելը դեռ վաղ է»:

«Ազատություն» ռադիոկայան 

Share

Comments are closed.