Այդ սկանդալի բոլոր մասնակիցները բարձրաստիճան հայտնի մարդիկ են։
Հարսի հայրը՝ Մեհթիևի փեսան, նախկին պատգամավոր է, անունն ու ազգանունը համընկնում է երկրի նախագահի անվանն ու ազգանունին՝ Իլհամ Ալիև։ Փեսայի հայրը՝ Ռովշան Մուստաֆաևը, պետանվտանգության ծառայության գնդապետ է, նա նույնպես 15–օրյա կալանքի է դատապարտվել։
Ադրբեջանում կորոնավիրուսի համավարակի օրերին հարսանիք անելը կտրականապես արգելված է 2020 թ–ի մարտից։ Այս մասին բազմիցս խոսել են և նախագահ Իլհամ Ալիևը, և վարչապետը, և կորոնավիրուսի դեմ պայքարի օպերատիվ շտաբը։
Բազմիցս կասեցվել են երկրի շրջաններում նվազագույն թվով հյուրերով հարսանիք անելու փորձերը։
Այդ մասին լուրերում միշտ հաղորդվել է, որ հանդիսության կազմակերպիչները կալանավորվել են, իսկ հարսանիքների բոլոր մասնակիցներին լուսանկարել են ոստիկանական բաժանմունքի միջանցքում, հետո այդ նկարները հրապարակել սոցցանցերում։
Այս «բարձրաստիճան» հարսանիքի լուսանկարներն ու տեսանյութերը լրատվամիջոցներում են հայտնվել այն բանից հետո, երբ դրանք իր ֆեյսբուքյան էջում է հրապարակել հյուրերից մեկը՝ երգչուհի Այսել Թեյմուրզադեն։
Նա Բաքվի հանրությանը ծանոթ է 2009 թ–ի «Եվրատեսիլին» Արաշի հետ կատարած Always երգով։
Հարսանիքն անցկացվում էր Բաքվի ավաններից մեկում՝ Նովխանիում։ Տեսանյութում երևում է, որ հանդիսությունն անցկացվել է փակ տարածքում, մարդիկ սեղանների շուրջ մեծ խմբերով են նստած։
Ընդ որում, օպերատիվ շտաբի սահմանած կանոններով, մեկ սեղանի շուրջ կարող է նստել վեցից ոչ ավելի մարդ, իսկ փակ տարածքներում ճաշկերույթներն ընդհանրապես արգելված են։
Հյուրերի թվում են նախկին և գործող նախարարներ, պատգամավորներ և այլ հայտնի անձինք։
82-ամյա Մեհթիևը Ադրբեջանի նախագահի վարչակազմի անփոփոխ ղեկավարն էր 1995 թ–ից։ Բացի այդ, դրանից առաջ՝ ԽՍՀՄ տարիներին, նա նմանատիպ պաշտոն էր զբաղեցնում ներկայիս նախագահ Իլհամ Ալիևի հոր պաշտոնավարման ժամանակ։
2019 թ–ի հոկտեմբերին նա պաշտոնանկ արվեց, զբաղեցրեց Գիտությունների ակադեմիայի նախագահի պաշտոնն ու Ադրբեջանի Անվտանգության խորհրդի անդամ է։
Սկզբից իշխանությունները փորձում էին հարսանիքը ներկայացնել որպես «սովորական ճաշկերույթ», այդպես էր լրագրողներին ասել ներքին գործերի մամուլի քարտուղար Էհսան Զահիդովը։
Այնուհետև նա հայտարարել էր, որ նման բան չի ասել, և միայն հետո ՆԳՆ մամուլի ծառայությունը հայտարարությամբ էր հանդես եկել, որ մեղավորները պատասխան են տալու օրենքի ողջ խստությամբ։
Հասարակության զայրույթն էր առաջացրել պատգամավոր Սիավուշ Նովրուզովի արձագանքը, որը նույնպես մասնակցել էր հարսանիքին։
Նա լրագրողներին հայտարարել էր․ «Այո, ես ներկա եմ եղել հարսանիքին և լավ եմ արել»։
Դրա համար Նովրուզովը նախազգուշացում է ստացել «Ենի Ազերբայջան» իշխող կուսակցությունից, որի կառավարման անդամ է։
Սոցցանցերում շարունակվում է վրդովմունքը, այնտեղ 15–օրյա կալանքն ու նախազգուշացումը բավականաչափ խիստ պատիժ չեն համարում։ Շատերն են պահանջում այնպես վարվել, ինչպես սովորական քաղաքացիների դեպքում․ լուսանկարներն էլ հրապարակել ոստիկանական բաժանմունքի միջանցքում։
Մեկնաբանություն
Հայտնի լրագրող և բլոգեր Համիդ Համիդովը ֆեյսբուքյան իր էջում գրում է․
«Նրանք թքած ունեն բացարձակապես բոլորի վրա՝ մյուս պաշտոնյաների, որոնք կարանտինի հետ կապված միջոցներ են ձեռնարկում, բժիշկների վրա, որոնք իրենց կյանքի գնով բուժում են կորոնավիրուսով հիվանդներին, հասարակ մարդկանց, որոնք տանջվում են հացի փող չունենալուց և որոնց ոստիկանությունն ամեն օր տուգանում է այն բանի համար, որ դիմակ չեն կրում։
Հարսանիքի հյուրերի մեկնաբանությունների լկտիությունը խոսում է այն մասին, որ նրանք թքած ունեն օրենքի և հասարակ մարդկանց վրա։ Հույս ունեմ, որ օրենքի նման ցցուն խախտումն անպատասխան չի մնա։ Չի կարելի այսքան զայրացնել և հիասթափեցնել մարդկանց»։
