Արցախի նախկին պետնախարարի խորհրդական Արտակ Բեգլարյանը չի կարծում, թե Արցախում իշխանափոխությունը, որն ավարտվեց նախագահի ընտրությամբ, տեղի ունեցավ սահմանադրական լեգիտիմության զգալի պակասի պայմաններում։
Նշելով, որ ցանկացած իրավիճակ, զարգացում, պետք է գնահատել տվյալ համատեքստում՝ Բեգլարյանն ընդգծեց՝ այս համատեքստում սահմանադրական լեգալության խնդիր չկա՝ գործընթացն ամբողջությամբ տեղավորվում էր Սահմանադրության իրավակարգավորումներում։
Բեգլարյանը, սակայն, ժողովրդաիշխանական լեգիտիմության խնդիր է տեսնում, այսինքն՝ ժողովրդի մոտ վստահության ձևավորում, ժողովրդի կողմից դրական կարծիքի ձևավորում։
«Այս տեսանկյունից՝ այո՛, խնդիր կա և այս իրավիճակում մենք այլընտրանք չունեինք, որովհետև մենք ի վիճակի չէին ընտրություններ կազմակերպել, արտահերթ ընտրություններ ի դեպ սահմանադրական կարգավորումների միաժամանակյա նախագահական և խորհրդարանական համապետական ընտրություններ, դա հավանաբար նույնիսկ դժվար թե կարողանայինք կյանքի կոչել, բայց եթե կյանքի էլ կոչեինք, բավականին երկար ժամանակ հանրապետությունը կընկներ՝ Արցախը և ներքին կյանքը կընկնեին մեծ ցնցումների մեջ, բավականին լուրջ վնասներ կկրեինք, արդյունքում այս որոշումն է կայացվել, որը կրկին ասեմ, որ որևէ իրավական կարգավորման խնդիր չկա», – եզրափակեց Բեգլարյանը։
Արցախի Ազգային ժողովը շաբաթ օրը արտահերթ նիստում, գաղտնի քվեարկությամբ, Սամվել Շահրամանյանին ընտրեց Արցախի նախագահ։ Ընտրությունից ժամեր անց Բաքուն կոչ արեց միջազգային համայնքին դատապարտել Ղարաբաղի ընտրությունները:
Եվրամիությունը հայտարարեց, որ չի ճանաչում Ստեփանակերտում անցկացված նախագահական ընտրությունների «սահմանադրական և իրավական շրջանակը»։
Հայտարարությունը տարածած Եվրամիության արտաքին քաղաքական ծառայության խոսնակը միևնույն ժամանակ ընդգծեց՝ Եվրամիությունը կարծում է, որ Ղարաբաղի հայերի համար կարևոր է համախմբվել դե ֆակտո ղեկավարության շուրջ, որն «ի վիճակի է և ցանկանում է մասնակցել Բաքվի հետ արդյունքներին միտված քննարկումներին»:
«ԵՄ-ն հանձնառու է աջակցել այս գործընթացին»,- նշված էր հայտարարությունում։
