Թ
ուրքիայի վարչապետի աննախադեպ հայտարարությունը հրապարակվել է ութ լեզուներով, այդ թվում` արեւելահայերեն եւ արեւմտահայերեն
Թուրքիայի վարչապետը պատմության մեջ առաջին անգամ Հայոց ցեղասպանության զոհերի հիշատակի օրվա նախօրեին հանդես է եկել անսպասելի հայտարարությամբ, որում, մասնավորապես, Թուրքիայի պետության անունից ցավակցություն է հայտնել այն հայերի թոռներին, ովքեր «կորցրել են իրենց կյանքը 20-րդ դարի սկզբին»:
Օսմանյան Թուրքիայում տեղի ունեցած Հայոց ցեղասպանությունը Ռեջեփ Էրդողանը ձեւակերպում է որպես «1915 թվականի իրադարձություններ» եւ որակում իբրեւ «ընդհանուր ցավ»:
Էրդողանի գրասենյակի տարածած հայտարարությունում նշվում է, թե 1915 թվականի դեպքերի վերաբերյալ բազմակարծություն է Թուրքիայում, ինչը կարեւոր է խոսքի ազատության տեսանկյունից:
Ութ լեզուներով՝ բնագրի ոչ պաշտոնական թարգմանությամբ, այդ թվում՝ արեւելահայերեն եւ արեւմտահայերեն, հրապարակված հայտարարության մեջ նաեւ ասվում է. «Ապրիլի 24-ը ամբողջ աշխարհի հայերի համար պատմական հարցի շուրջ ազատորեն խոսելու լավ առիթ է: Անվիճարկելի է, որ Օսմանյան կայսրության վերջին տարիները, անկախ կրոնից՝ թուրք, հայ, քուրդ, արաբ եւ այլ միլիոնավոր մարդկանց համար եղել են դժվարին ժամանակաշրջան: Ինչպես ասել են մեր նախնիները՝ «կրակն ընկած տեղն է այրում»: Օսմանյան կայսրության ամբողջ բնակչության՝ այդ թվում հայերի ցավը կիսելն ու նրանց հիշողությունները հասկանալը մեր մարդկային պարտքն է»:
Միաժամանակ, Էրդողանը շեշտում է, թե անընդունելի է համարում 1915 թվականի իրադարձությունները որպես քաղաքական լարվածության միջոց օգտագործելը: «Առաջին համաշխարհային պատերազմի ժամանակ տեղի ունեցած դեպքերը բոլորիս համատեղ վիշտն է», – վստահեցնում է Թուրքիայի վարչապետը՝ շարունակելով, թե «Առաջին աշխարհամարտի դեպքերի պատճառով տեղի ունեցած տեղահանությունը չպետք է հայերի եւ թուրքերի միջեւ մարդկային հարաբերությունների եւ վարքագծի խոչընդոտ հանդիսանա»:
«Ուզում ենք, որ 20-րդ դարի սկզբին իրենց կյանքը կորցրած բոլոր հայերի հոգիները հանգչեն խաղաղությամբ, իսկ նրանց թոռներին հայտնում ենք մեր ցավակցությունը», – ասված է Թուրքիայի վարչապետի հայտարարությունում:
Լուսինե ՄՈՒՍԱՅԵԼՅԱՆ
www.azatutyun.am/content/article/25359676.html
