Jyllands-Posten. «Ինչո՞ւ ԱՄՆ-ը հրաժարվեց Պուտինի գազատարի դեմ պատժամիջոցներից»

 

© AP Photo, Jens Buettner/dpa

Այնքան շատ սպառնալիքներ և բարձրագոչ հայտարարություններ կային առ այն, որ Միացյալ Նահանգները պատրաստ էր անել ամեն ինչ՝ կանխելու ռուս-գերմանական գազատարի շինարարության ավարտը: Եվ այսպես, Բայդենը փոխեց իր միտքը, չնայած ամերիկացիները շարունակում են ամբողջ ուժով քննադատել այս նախագիծը: Գերմանիայի արտգործնախարարը բարձր է գնահատել Միացյալ Նահանգների այս «կառուցողական քայլը»: «Հյուսիսային հոսք -ը  փրկվա՞ծ է:

Այնքան շատ սպառնալիքներ ու բարձրագոչ հայտարարություններ կային, որ ԱՄՆ-ը պատրաստ էր անել հնարավորը  սկանդալային «Հյուսիսային հոսք – 2» գազատարի  կառուցման ավարտը կանխելու համար: Ռուս-գերմանական գազատարը երկար տարիներ հանդիսացել է ԱՄՆ-Գերմանիայի հարաբերությունների գլխավոր խոչընդոտը:

Բայց հիմա ԱՄՆ-ն որոշել է հրաժարվել «Հյուսիսային հոսք – 2»-ը կառուցող ընկերության դեմ պատժամիջոցներից: Ընկերության բարձրագույն ղեկավարությունը, այդ թվում գործադիր տնօրեն Մաթիաս Ուարնիգը ՝ «Շտազիի» նախկին գործակալը, որը մտերիմ է Ռուսաստանի նախագահ Վլադիմիր Պուտինի հետ, ջրից չոր են դուրս գալիս:

«ԱՄՆ-ին ձեռնտու է պատժամիջոցների կիրառումից հրաժարվելը»,- չորեքշաբթի ասաց ԱՄՆ պետքարտուղար Էնթոնի Բլինկենը:

Փորձագետներն այս անսպասելի հայտարարությունը մեկնաբանում են հետևյալ կերպ. Վաշինգտոնը «Հյուսիսային հոսք – 2» -ը համարում է  նախկինից ժառանգած խնդիր, որը պետք է վերացվի, քանի որ Գերմանիայի հետ հարաբերությունները բարձրացել են առաջնահերթությունների ցուցակում: Գերմանիայի կառավարությունը աջակցում է գազատարին: Բեռլինում նրանք կարծում են, որ այս գործը բացառապես բիզնեսի ոլորտից է:

«Գերմանիան ԱՄՆ-ի ամենակարևոր դաշնակիցն է, երբ խոսքը վերաբերում է Ռուսաստանի հետ հարաբերություններին: Կոնգրեսը համաձայնել է փորձել դանդաղեցնել «Հյուսիսային հոսք – 2» -ը, սակայն այս ոլորտում օրենսդրությունը նաև հնարավորություն է տալիս հրաժարվել պատժամիջոցներից: Բայդենի կառավարությունը նույնպես շատ քննադատաբար է վերաբերվում այս նախագծին և դրա մասին բարձրաձայնել է պարզ ու հստակ: Բայց նա շահագրգռված չէ պատժամիջոցներ կիրառել բոլորի դեմ՝ միայն թե  դադարեցնի կառուցումը»,- ասում է գերմանական Wissenschaft und Politik վերլուծական կենտրոնի քաղաքագետ Սաշա Լոհմանը:

Գերմանիայում ԱՄՆ դեսպանության խոսնակ Ջորդոնո Շոլցը Jyllands-Posten-ի հետ զրույցում շեշտեց, որ ամերիկացիները «շարունակում են համագործակցել Գերմանիայի հետ և անհանգստություն են հայտնում գազատարի հետ կապված ռիսկերի վերաբերյալ»:

Ըստ Financial Times-ի, Գերմանիայի արտաքին գործերի նախարար Հայկո Մաասը շտապել է ողջունել «կառուցողական քայլը», որն արտացոլում է երկու կառավարությունների «գերազանց հարաբերությունները»:

Բիզնես կամ քաղաքականություն

Բայդենի նախորդ Դոնալդ Թրամփի` ԱՄՆ նախագահ եղած չորս տարիների ընթացքում Բեռլինի և Վաշինգտոնի հարաբերությունները կտրուկ վատթարացան: Թրամփը պարբերաբար հրապարակավ քննադատել է Գերմանիային «Հյուսիսային հոսք – 2»-ի պատճառով, և այն փաստի համար, որ այս երկիրը, ինչպես Դանիան, չնայած ՆԱՏՕ-ի առջև ստանձնած խոստմանը, չի ծախսում ՀՆԱ-ի 2%-ը պաշտպանության ծախսերի վրա:

Վաշինգտոնի նոր կառավարությունը շարունակում է քննադատել խողովակաշարը: Որոշ պատժամիջոցների վերացմանը զուգընթաց՝ Միացյալ Նահանգները մի քանի նոր տույժեր են մտցրել ռուսական նավերի նկատմամբ, որոնք օգնում են կառուցել գազատարը: Սաշա Լոհմանը նշում է, որ չնայած պատժամիջոցները հանվեցին, այնուամենայնիվ, շատ ֆինանսական ընկերություններ «Հյուսիսային հոսք – 2» -ը և դրա բարձր ղեկավարությունը դասում են ռիսկային բիզնես գործընկերների շարքին:

«Ուստի, հնարավոր է, որ նրանք ամեն դեպքում բախվեն խնդիրների, քանի որ ֆինանսական հաստատությունները կարող են չցանկանալ իրենց անունից վճարումներ կատարել»,- ասում է նա:

ԱՄՆ-ն դեմ է գազատարին, քանի որ կարծում է, որ այն եվրոպացիներին կախվածության մեջ կդնի ռուսական գազից, ինչը նշանակում է, որ դա ռուսներին ճնշում գործադրելու հնարավորություն կտա: Բացի այդ, Վաշինգտոնը և դրան մոտ գտնվողները նախազգուշացնում են, որ Ուկրաինան կկորցնի եկամտի կարևոր աղբյուրը, եթե ռուսներն ավելի քիչ օգտագործեն Ուկրաինայով անցնող գազատարները:

Քննադատները պնդում են, որ ԱՄՆ-ն ավելի շուտ դիմադրում է շինարարությանը, քանի որ ցանկանում է իր թանկարժեք հեղուկացված գազը վաճառել եվրոպացիներին:

Հատուկ «Անալիտիկոնի» համար ռուսերենից թարգմանեց Աննա Բարսեղյանը

 Սկզբնաղբյուրը` Inosmi

 

Share

Comments are closed.