Շրջափակումն արցախցի ծնողների համար խիստ մտահոգիչ խնդիրներից է դարձրել իրենց զավակների մանկությունը հնարավորինս անհոգ դարձնելը, առօրյա խնդիրներից զերծ պահելը, որպեսզի այնքան էլ չզգացվի երեխաների ժամանցի որոշ ձևերի, քաղցրավենիքի, հյութերի ու մրգերի բացակայությունը:
ՍՏԵՓԱՆԱԿԵՐՏ, 10 հուլիսի, ԱՐՑԱԽՊՐԵՍ: Արցախցի երեխաներին ինչ-որ չափով ուրախ ժամանց պարգևելու հնարավորություն է ընձեռում Ստեփանակերտի Ն. Ստեփանյանի անվան պուրակում գործող մանկական զվարճանքների կենտրոնը, որ չնայած առկա խնդիրներին, շարունակում է գործունեությունը:
«Արցախպրես»-ի թղթակցի հետ զրույցում կենտրոնի տնօրեն Վարուժան Պետրոսյանը ներկայացրել է, որ գործում է ավելի քան 38 խաղային ատրակցիոն, այդ թվում` ավտոդրոմ, կարուսել, տեսախաղեր, 7D ֆիլմադարան, հրաձգարան՝ օդամղիչ հրացանից և այլն:
«Ավտոդրոմն անվճար է մինչև 6 տարեկան երեխաների համար, իսկ կարուսելը՝ մինչև 3 տարեկանների։ Կենտրոնի շենքում տեղադրված խաղային սարքերի մեծ մասը երեխաներին տրամադրում են բոնուսային տոմսեր, որոնք փոխանակում ենք խաղալիքներով, որոնք, սակայն շրջափակման պայմաններում չենք կարողանում ձեռք բերել»,-մանրամասնել է մեր զրուցակիցը՝ հավելելով, որ շրջափակման հետևանքով հետաձգվել է թենիսի սեղան տեղադրելու ծրագիրը:
Այստեղ մանուկները կարող են վայելել նաև իրենց սիրելի քաղցրավենիքը , այդ թվում՝ տեղում պատրաստվող պաղպաղակ, որի համար անհրաժեշտ հումքը վերջին 10-օրյակում խիստ սուղ է դարձել:
Ըստ տնօրենի՝ շրջափակման ընթացքում այցելող երեխաների թիվը չի նվազել, իսկ իրենք ջանք ու եռանդ չեն խնայում նրանց անվտանգ և ուրախ ժամանցն ապահովելու համար: Տարածքը, ինչպես և նախկինում, շարունակվում է ամենօրյա պարբերականությամբ ախտահանվել, ինչպես նաև կատարվում են տեխնիկական ստուգումներ։
Այդուհանդերձ՝ շրջափակումը բացասաբար է ազդել նաև մանկական զվարճանքի կենտրոնի գործունեության վրա. մասնավորապես՝ հովհարային անջատումների ընթացքում չի գործում էլեկտրական խաղասարքերի մեծ մասը:
