Հունաստանի և Թուրքիայի հակամարտությունը կարող է տեղափոխվել նոր՝ ավելի սուր փուլ, ինչի մասին վկայում են ոչ միայն երկու երկրների պաշտոնատար անձանց հայտարարությունները, առաջատար լրատվամիջոցներում հրապարակումները, այլև Աթենքի ու Անկարայի կոնկրետ քայլերը։ Եվրամիության օգնությամբ դեֆոլտը հաղթահարած Հունաստանը վերազինվում է, ձգտելով վերականգնել ուժերի հավասարակշռությունը Էգեյան և Միջերկրական ծովերում և «շրջանցել» թուրքական աներկբա գերակշռությունը ցամաքում, իսկ Թուրքիան դրանում մարտահրավեր է տեսնում տարածաշրջանում թուրքական «բնական» (ըստ թուրքական իշխանությունների) հեգեմոնիային, ինչպես նաև «նորոգում» է իր պատմական վախերն ու բարդույթները՝ «Սևրի սինդրոմի» տեսքով։
ԱՄՆ կոնգրեսի համատեղ նիստում Հունաստանի վարչապետ Կ.Միցոտակիսի պատմական ելույթը և կոչը Վաշինգտոնին՝ սահմանափակել Թուրքիայի հետ ռազմական կապերը, բարենպաստ արձագանք են գտել ամերիկյան երկու կուսակցությունների օրենսդիրների մոտ, որոնք հոտընկայս ծափահարել են ժողովրդավարության օրրանը ներկայացնող հյուրին։ Փարիզից նույնպես պարբերաբար հնչում են հայտարարություններ հօգուտ Հունաստանի և ընդդեմ Թուրքիայի, և դա Ֆրանսիայի դիրքորոշումն է 2020 թվականից ի վեր, երբ տարածաշրջանը կանգնել էր սպառնացող պատերազմին դեմ առ դեմ։ Նախագահ Մակրոնի կոշտ դիրքորոշումը, նրա ժողոված «Միջերկրածովյան կոալիցիան», ի դեմս յոթ երկրների, Կորսիկայում կայացած գագաթնաժողովում համերաշխություն է հայտնել Հունաստանին և կանխել թուրքական ագրեսիան այն ժամանակ՝ երկու տարի առաջ։
Նախագահ Էրդողանի «խնդրահարույց 2023»-ը՝ Ուկրաինայում պատերազմի համապատկերում, կարող է հիմնարար գործոն դառնալ Հունաստանի ու Թուրքիայի միջև լարվածության նոր՝ միանգամայն անկանխատեսելի ալիքի համար։ Միևնույն ժամանակ, 1923-ից հետո այդ երկրներն, ի հեճուկս երկկողմանի հարաբերությունների հակամարտայնության, կարողացել են մշակել պատերազմի կանխարգելման մեխանիզմներ, առավել ևս, որ նրանք ֆորմալ առումով 1952-ից ի վեր դաշնակիցներ են ՆԱՏՕ-ի շրջանակում։
Առաջիկա ամիսներին ի՞նչ գործոններ են առաջնային լինելու մեր հարևան երկիր Թուրքիայի և պատմականորեն բարեկամական երկիր Հունաստանի հարաբերություններում։ Այս մասին կարդացեք մեր նոր թողարկման նյութերում։
«Անալիտիկոն»-ի խմբագրություն
