Վաշինգտոնը դարձավ Հայաստանի ու Ադրբեջանի դիվանագիտական գերատեսչությունների ղեկավարների միջև բանակցությունների նոր փուլի հարթակ։ Ամերիկյան կողմի միջնորդությամբ այնտեղ անցկացված քառօրյա մարաթոնը կարիք ունի արդյունքների որոշակի ամփոփման։ Բնականաբար՝ նախնական, քանի որ դրան հաջորդելու է հանդիպումների շարք արդեն եվրոպական հարթակներում, ինչպես նաև նախարարների հանդիպում Ռուսաստանում, ինչի մասին արդեն հայտարարել են կողմերն ու կազմակերպիչները։
Ակնհայտ է, որ դատողություններ կարելի է անել ըստ մամուլի պաշտոնական հաղորդագրությունների ու մասնակիցների հայտարարությունների, ինչպես նաև ըստ առանցքային պաշտոնյաների հայտարարությունների, որոնց հրապարակային կարծիքներն ապրիորի չեն կարող նրանց անձնական կարծիքները լինել։
Նախ՝ հարկ է ասել, որ վաղուց արդեն չեն եղել աշխատանքային օրվա ողջ կտրվածքով ու մարաթոնյան ռեժիմով այսպիսի խորհրդատվություններ չորս օր շարունակ։ ԱՄՆ պետքարտուղար Էնթոնի Բլինքենի հայտարարության լավատեսական տոնը, որն առանձնանում էր անմիջական մասնակիցների զգուշավոր հայտարարությունների խորապատկերում, մի շարք դիտորդներ բացատրում են սեփական հարթակի նշանակությունը գերագնահատելու ձգտումով։ Սակայն, որքան հասկանում ենք, խնդիրն ավելի մեծ խորք ունի, ընդգրկումն էլ՝ շատ ավելի լայն, հատկապես տարածաշրջանի շուրջ փոխակերպումների համապատկերում, որոնք պայմանավորված են փաստացի արդեն իսկ սկսված ուկրաինական հակահարձակմամբ և Թուրքիայում ընտրություններով, այդ ամենում ԱՄՆ-ի ու Եվրամիության դերով։ Համենայն դեպս, Միացյալ Նահանգների աննախադեպ դիվանագիտական ակտիվությունը (Եվրոպայի հետ լիակատար փոխըմբռնման պայմաններում) կարևորագույն գործոն է, որն ի զորու է մեր ողջ տարածաշրջանում փոփոխել դասավորվածությունները, այդ թվում՝ ուժային, ի հեճուկս Մոսկվայի դժգոհության։
Բանակցային գործընթացն էլ, մյուս կողմից, զուգակցվում է Հայաստան-Ադրբեջան սահմանի Սոթքի հատվածում ապակայունացմամբ, որի նախաձեռնողը Ալիևի վարչակարգն է, և այդ ապակայունացմանը Հայոց Բանակի կոշտ, աննախադեպ կոշտ հակազդեցությամբ։
Անցած բանակցային փուլին նվիրված մեր հատուկ թողարկման մեջ հայ փորձագետներն ուշադրություն են հրավիրում գործընթացի կարևոր մանրամասների վրա, ինչը, մեր կարծիքով, լսարանին կօգնի ավելի լավ ընկալել կատարվածը։
«Անալիտիկոն»-ի խմբագրություն
