Մեծ քաղաքներում փողոցային արվեստը շատ զարգացած է: Հաճախ քաղաքաբնակների գեղագիտական հայացքները տեղ են գտնում մոխրագույն շենքերի պատերին` դառնալով արվեստի իսկական գործեր: Պատերին արված նման պատկերները արդի մշակույթում անվանում են գրաֆիտի: Այս արվեստը Հայաստանում նոր է զարգանում: Գրաֆիտին ունի մի շարք ոճեր. դրանցից մեկն էլ մարդկային դիմանկարների պատկերումն է:
Վերջերս երևանյան պատերին հայտնվում են հայ մեծերի դիմապատկերները: Սկզբում` Մհեր Մկրտչյան (Խանջյան 13), հետո` Սոս Սարգսյան (Վարդանանց 14), Արամ Խաչատրյան (Վարդանանց 14), Պարույր Սևակ (Կենդանաբանական այգու հարևանությամբ), Ավետիք Իսահակյան (Կենդանաբանական այգու հարևանությամբ), Եղիշե Չարենց (Կենդանաբանական այգու հարևանությամբ): Դիմանկարների հեղինակը դիզայներ-գրաֆիկ Ռոբերտ Նիկողոսյանն է: Նա Երևանի գեղարվեստի պետական ակադեմիայի շրջանավարտ է:
Մի օր որոշեց սիրելի Մհեր Մկրտչյանի մեծ դիմանկարը պատկերել բոլորի աչքից հեռու, Նոր Նորքի 4-րդ զանգվածի մի կիսակառույցի պատին: Մհեր Մկրտչյանից հետո հայ մեծերի շարքը ձգվեց ամբողջ պատի երկայնքով. Պարույր Սևակ, Սոս Սարգյան, Շառլ Ազնավուր, Մոնթե Մելքոնյան: «Եթե պատն ավելի երկար լիներ, հայ մեծերի մի քանի դիմանկարներ իրար կողքի ավելի շատ կպատկերեի` պանորամայի ձևով»,- ասում է նկարիչը:
Դիմացի բարձրահարկի բնակիչներից մեկը պատուհանից տեսել էր Ռոբերտի աշխատանքն ու նկարների ներքևի մասում հաղորդագրություն թողել՝ խնդրելով Մոնթեին նկարել:
Դրական կարծիքներից ոգևորված` Ռոբերտն ավելի վառ գույնի ներկերով Նոր Նորքի 4-րդ զանգվածից իջավ քաղաքի կենտրոն: Այստեղ նույնպես առաջինը Մհեր Մկրտչյանի դիմանկարը ստեղծվեց: Նկարչի նպատակը մեկն է` ծանոթացնել մեր համաքաղաքացիներին հայ մեծերի հետ: Վերջին ամիսներին Նոր Նորքի 4-րդ զանգվածի կիսակառույցի պատը համալրվել է նաև Առնո Բաբաջանյանի, Վիլյամ Սարոյանի ու Կոմիտասի դիմապատկերներով: Նկարչի խոսքերով` հնչել են տարբեր, բայց հիմնականում դրական կարծիքներ: «Եթե հաշվի առնես մի քանի կարծիք, հաստատ քեզ մոտ ոչինչ չի ստացվի, իսկ համարձակությունն այն է, որ գրաֆիտին փողոցային նկարչական ոճ է: Կարող ենք մարդկանց դեմքեր ստանալ, պատկերներ, ոմանք կնայեն, կասեն՝ էս ի՞նչ են արել, մարդիկ կլինեն, նույնիսկ կասեն` պատերը կեղտոտում են: Մարդիկ էլ կլինեն՝ շատ կհավանեն»,- ավելացնում է Ռոբերտը:
Երիտասարդ նկարչի գաղափարները շատ են, սպասենք հաջորդ դիմանկարներին:
Մերի Իսայան
