STARMUS VI գիտության և արվեստի փառատոնի շրջանակում փառատոնի համահիմնադիր, աստղաֆիզիկոս Գարիկ Իսրայելյանը, հայազգի առաջին տիեզերագնաց Ջեյմս Բաղյանը և Astronomy պարբերականի գլխավոր խմբագիր, գրող Դեյվիդ Էյքրը հանդիպել են Երևանի պետական համալսարանի ուսանողների հետ: Նրանք խոսել են STARMUS-ի, սովորելու և գիտության կարևորության մասին:
Մաքսիմալ փորձառություն ձեռք բերել
Գարիկ Իսրայելյանն ասել է, որ STARMUS փառատոնի ոգեշնչումը գալիս է իր ուսանողական տարիներից, երբ իրեն զգում էր 100 տոկոս ազատ, վայելում էր թե՛ ուսումը, թե՛ կյանքը՝ ամբողջությամբ։
«Պարտադիր չէ, և նույնիսկ, հնարավոր էլ չէ, որ դուք ամեն ինչ սովորեք։ Կարող եք օրվա մեջ հստակ երկու ժամ տրամադրել ուսմանը և հաջողել։ Ես չեմ հիշում ինձ 8 կամ 9 ժամ սովորելիս։ Ուսանողները պետք է փորձեն վայելել ամեն ինչ, լինեն դրական, ջանքեր դնեն իրենց ուսման մեջ ու դա երբեք չի ձանձրացնի, չեք հոգնի։
Պետք է շատ փորձառություն ձեռք բերեք և չունենաք վատատես հայացքներ։ Դուք կարող եք շատ բաներ անել, սովորել, սխալվել, փորձել և դրանցից մեկը կհաջողի»,- ասել է Գարիկ Իսրայելյանը։
«Իմ սպասումները գերազանցվեցին»
Դեյվիդ Էյքրը կիսվել է Հայաստան այցի տպավորություններով.
«Առաջին անգամն եմ Հայաստանում։ Գիտեի, որ այստեղ հրաշալի է լինելու, բայց իմ սպասումները գերազանցվեցին։ Ձեր երկիրը հրաշալի վայր է՝ ջերմ և սքանչելի մարդկանցով։ Հիացած եմ՝ տեսնելով այստեղի մշակույթն ու պատմությունը»:
Անդրադառնալով գիտությանը՝ գրողը նշել է, որ այն մարդկանց տալիս է պատկերացումների հստակ շրջանակ՝ թե ի՞նչն է ճիշտ, ո՞րն է իրականությունը և ինչպե՞ս է տիեզերքը գործում. «Հենց սրա մասին է STARSMUS-ը և մենք շատ ուրախ ենք աջակցել փառատոնին»:
Նրա խոսքով՝ վերջին մեկ կամ երկու տասնամյակն աստղագիտության համար շատ հետաքրքիր ժամանակ է եղել։
«Մենք իմացել և իմանում ենք ավելի հիմնարար բաներ այն մասին, թե ինչպես է տիեզերքն առաջացել և զարգացել։ Ուստի՝ այս ժամանակը իսկապես հեղափոխական է և տիեզերական առաքելությունները մեզ իսկապես աննախադեպ արդյունքներ են հաղորդում։ Տիեզերքում դեռևս կան մեծ-մեծ անակնկալներ և հույս ունենք, որ շուտով կլինի պատասխանը հարցերի, թե ինչպե՞ս և ինչո՞ւ ենք մենք այստեղ։ Դրա համար պետք է հասկանալ, թե ինչպես կարող են գիտության տարբեր ճյուղեր մեկտեղվել և աշխատել միասին»,- նշել է Astronomy պարբերականի գլխավոր խմբագիր:
Պետք է ճանաչել միմյանց արժեքները
Ջեյմս Բաղյանն ուսանողներին խորհուրդ է տվել գիտակցել, որ իրենք պարզապես ինժեներ, ֆիզիկոս, քիմիկոս աստղագետ կամ մաթեմատիկոս չեն:
«Ես միշտ հետաքրքրասեր եմ եղել, տարբեր բաներ հասկացել եմ և կարողացել եմ դրանք մեկտեղել։ Դուք էլ պետք է իմանաք, թե ինչով են զբաղվում այլ մարդիկ, կարողանանք արդյունավետ և միմյանց համար հասկանալի հաղորդակցվել։ Ճանաչել միմյանց մշակույթը, արժեքները, դա իսկապես շատ կարևոր է։ Բայց երբ ուսանող էի, ուզում էի սովորել ֆիզիկա և քիմիա, ինժեներական տեխնոլոգիաներ և դրանց նման այլ բաներ:
Ուրախ էի, որ ինժեներական համալսարան էի ընդունվել, որտեղ ստիպված չէի լեզու սովորել: Կարծում եմ՝ ճիշտ դատողություն չէր, չէի գիտակցում դրա կարևորությունը: Բարեբախտաբար, դուք ունեք այդ հնարավորությունը, քանի որ այն բացում է ավելի շատ դռներ, որոնցից դուք կկարողանաք օգտվել։ Եթե դուք չօգտվեք դրանից, կիսատ մարդ կլինեք, չեք հասնի այն ամենին, ինչ կարող էիք ունենալ և վայելել»,- ասել Ջեյմս Բաղյանը։
Արփի Ջիլավյան
Mediamax.am
